Amò n istà col “Gust de la Lum”

 

L’é l terzo an che la sociazion FassaLux, col sostegn di Comuns, vida i bec per n istà de scomenzadives de spas e ensegnament

Sozietà - Vedù l bon ejit di egn passé, nos joegn de la sociazion FassaLux se aon pissà de jir inant e de fèr a na vida che l “Gust de la Lum” dovente n projet continuatif. Donca ence chest istà, per i joegn anter i 13 e i 16 egn de la Val (da la clas seconda de la scola mesèna fin la seconda de la scola auta), vegnarà endrezà la terza edizion de “Dna-Gust de la Lum!”, na scomenzadiva sostegnuda da duc i Comuns de noscia val.
L program de chest an perveit de scomenzèr ai 23 de messèl e jir inant dapò enscin ai 31 de aost, con desvaliva ativitèdes dal lunesc al vender, da les 8.30 da doman fin les 16.30 domesdì. A duc i bec che tolarà pèrt ge vegnarà proponet n program amò n’outa originèl, rich e algegher. Aló da l’oratorie de Poza vegnarà endrezà dì per dì momenc de jech, de stèr ensema, de festa; se sà ben, da spes se jirà stroz a pe, sa mont, ti ciantons più carateristics, a descorir i posć più bie e curiousc de noscia valèda. Ogne dì sarà n grop che cojinarà, che netarà sù, che lavarà jù, per emparèr mìngol i mestieres de cèsa e soraldut a se meter a la leta di etres. Chest an a la scomenzadiva ge vegnarà dat n tai “biologich”, su la valorisazion del corp, con setemènes a tema olache ogne bez podarà se vardèr mìngol miec, daìte e de fora. Muscoi, cher, polmons, cervel, eies, mans... Marevees che besegna cognoscer, percheche se les posse aprijièr e respetèr.
Se fossa debesegn endèna l cors vegnarà endrezà ence ores de studie spezifiches per la materies de scola da se recuperèr.
Dò l gran e positif ejit di doi egn passé, speton endò n bel numer de enscinué, per ruèr a tastèr endodanef duc ensema l’ensaorì e piajegol “Gust de la Lum”!
Se cogn se scriver ite dant dai 31 de mé. Duc i genitores enteressé i pel troèr duta la informazions sul sit internet de FassaLux olache l’é ence i numeres de telefon e ence desvalives retrac.
Thomas Zulian

 

Usc di Ladins 25.05.12.pdf